Pas rënies së komunizmit në Shqipëri, shumë nga besimtarët e parë të rifillimit të kishës ungjillore në Shqipëri filluan të luten që Zoti të na japë fjalën e Tij të plotë në gjuhën tonë. Ato lutje morën përgjigje të pjesshme me botimin e Biblës ABS në vitin 1994. Në mungesë prej dekadash të një fjalori me fjalë dhe shprehje biblike si dhe në njerëz të përgatitur teologjikisht, puna e përkthimit të Biblës ishte veçanërisht e vështirë në ato vite.

Pas mbi 30 vjet eksperiencë në studimin e fjalës së Perëndisë, mësimin dhe predikimin rigoroz sipas doktrinës së shëndoshë biblike, dhe një proces konsultimi dhe këshillimi me pastorë dhe përkthyes të ndryshëm, mund të themi se Perëndia i është përgjigjur lutjeve tona për të patur në dorë fjalët e Tij të kulluara në Biblën "Kristoforidhi i Dytë". Kjo Bibël është vazhdimësi e punës që Zoti ka bërë në kombin tonë me anë të Biblës së Kostandin Kristoforidhit dhe Biblës ABS.

Qartësi

Bibla "Kristoforidhi i Dytë" sjell më tepër qartësi se më parë në përkthim fjalësh dhe shprehjesh. Duke studiuar dhe duke përkthyer së pari çdo fjalë, përpara përkthimit të vargjeve, kjo Bibël është më e qartë në lexim dhe në kuptueshmërinë e tekstit biblik.

Saktësi

Metoda e përkthimit duke studiuar së pari të gjitha fjalët e Biblës përpara përkthimit të vargjeve, siguron një nivel të lartë saktësie në të gjitha vargjet biblike. Bibla "Kristoforidhi i Dytë" është e vetmja Bibël në shqip që përdor këtë metodë përkthimi.

Vijimësi

Mënyra e vetme për të kuptuar Biblën në kontekst dhe pa gabime ose interpretime vetjake është duke krahasuar fjalët dhe vargjet me njëra tjetrën. Bibla "Kristoforidhi i Dytë" shkëlqen në vijimësinë e tekstit biblik, jo vetëm në tematikë, por në çdo fjalë dhe varg.